शब्द शिल्पकार
शब्द शिल्पकार
1 min
210
शारदेचे आशिष तुला, लेखणीची छिन्नी घेऊन,
शब्दांचा शिल्पकार तू, वर्णांना आकार देऊन.. .../१/
भाव प्रस्फुटीत करून, घडविसी रचना न्यारी,
कधी दारूण, आकांत, कधी कोमल सुकुमारी!... /२/
भावनांच्या शिंपल्यातील, मौक्तिक अक्षरांचे वेचून,
सजवतोस साहित्य माला, कल्पना अलंकार पेरून! ... /३/
केलेही आहेस सहन आघात मनी वैफल्याचे,
अव्हेरले जगाने जेव्हा, तू शब्द दिले कौशल्याचे! .../४/
कठोर घाव साहिल्यावर, लेख मूर्ती उभी राहते,
दाद मिळून तेव्हा, तुझ्या नावाची नौबत झडते! ...../५/