गुरूवीण दुजा.....

गुरुवीण दुजा

असा कोण नाही

गुरू एक आहे

सर्वज्ञही ||

गुरू मायेचा सागर

गुरू विद्येचे आगर

गुरू दाखवी वाट

जगण्याची ||

देण्या शिष्याला आकार

गुरू कष्टे अपरंपार

होई शिल्पकार

शिष्याचाही ||

गुरू रागवी प्रसंगी

शिस्त बाणण्या अंगी

जोडी नाते प्रेमाचेही

शिष्यासंगे ||

गुरू अनाथांची माय

गुरू भक्तीचाच ठाव

धरी छत्र सर्वांवरी

नेहमीच ||

गुरू सांगे तत्वज्ञान

प्रसंगी राखावे आत्मभान

करावे जीवन सुकर

सान्निध्यात ||

गुरू माझी माता

गुरू माझा पिता

गुरू एक दाता

प्रतिभेचा ||

गुरूस्थान अढळ

करावी भक्ती निर्मळ

गुरू दयेचा ओहोळ

पाझरावा ||

गुरूकृपेची महती

आता वर्णावी किती

जाणावी थोरवी

सदोदित ||

गुरू ईश सर्वांचा

रोज प्रेमे स्मरावा

आचरणी आणावा

गुरू उपदेश ||

गुरू आज वंदितो

गुरू चित्ती स्मरतो

ज्ञाने उजळतो एक

गुरूदीप ||