रंगमहाल
रंगमहाल
सजला होता रंगमहाल
मिणमिणत्या रोषणाईने
धुंद झालेला होता
त्या मादक अत्तराने
नृत्यांगणेच्या घुंगरावरी
बेहद खुश होतहोते
मनाविरुद्ध मग तिचेही
पाय थिरकत होते
चिमुकला तो निजलेला
आतल्या दरवाजा मागे
भान त्याचेही तिला
होते प्रत्येक पावलामागे
पदरी टाकून पोर कोवळे
अंधारात गेला होता
टीचभर पोटासाठी मग
तिने रंगमहाल सजवला होता
घेऊनि पोर पदरी ती
दारोदार फिरली होती
वखवखलेल्या वाईट नजरांनी
खरं तर ती शिणली होती
खिळतात त्या नजरा
फक्त भूक भागवण्यासाठी
नकोस झालेलं हे जगणं
चिमुकल्याला सांभाळण्यासाठी
नाही राहायचंय तिलाही
या नरकवाण्या रंगमहालात
पण सारेच सत्य नाही ना
घडत अहो या समाजात
पोराची भूक भागवण्यासाठी
खरं तर ती लढत होती
नकोशा झालेल्या आयुष्यात
तरीही रंगमहाल ती सजवत होती