परिवर्तन

गावाकडच्या हिरवाईची

मजा काही औरच होती

मायेनं बंधनात बांधलेली

सर्वत्र दिसणारी नातीगोती...

पायवाटी लाल,काळी माती

ओलावा ममतेचा सांगोपांग

अनवाणी पायाने चालतांना

फळा फुलांची लागलेली रांग...

दूर कुठे तरी निघून गेली

आज ती गावातली घरं

शहरातल्या उंच उंच इमारती

दूरूनच दिसती छान बरं.....

बंद खिडकीतून कशी डोकावणार

शीतल वा-याची झुळुक

कधीतरी माना उंचावून

पाहावी फक्त ता-यांची लुकलुक...

चकचकणारी घरं शहरी

दिसतात दूरून सुंदर

माणसाच्या आयुष्यात इथे

नसे भावनांना कदर..