पोकळी
पोकळी
आठव विश्वाने भरलेला
मनातला एक कोपरा ,
घड्याळाच्या टिक टिक सारखी -
सतत देत असतो जाण.
सुटका करणं सोपं नसतं ,
भूतकाळाच्या गतं विश्वातुन
प्रत्येक वेळी उभा रहातो ,
दत्त म्हणून सामोरा ठाकतो.
मनावरच्या जळमटांना घेऊन -
साथ देत असतो सावलीसारखा.
उखडून टाकू पहातो त्याला ,
प्रयत्न करतो विसरण्याचा.
काय कसा माहीत नाही ,
चिकटतो गोचीडासारखा आयुष्याला.
काय मिरवायचं असतं त्याला ?
आणि मिळवायचंही असतं काय ?
होय ! झाल्या असतील चुका हातून ,
सांडलं,लवंडलं गेलही असेल.
पण मग मलाच का हा त्रास ?
की मीच जबाबदार आहे सगळ्याला ?
असो ! मी तू तर केलं आयुष्यभर,
कळलच नाही, ते कधी सरलं भराभर.
अखेरपर्यंत तिला जपत आता राहायचं
भरतेय का, पहात आपलं बसायचं
आपल्याबरोबरच संपेल आता ही पोकळी
ठसठस, टिक टिक थांबेल मग सगळी.