संस्कार

मातीच्या आकारहीन गोळ्यांमधून

एक मडकं येतं आकाराला

संस्कार होतात भाजून ठोकून

कच्च नको कुठे राहायला

वापर कोण घेणार कसा करून

हे त्याच्या नशिबावर असतं

मर्तिकाजवळ की शरीर रंगवून

ते अजून ठरलेलं नसतं

शिलाची कपची अलवार जपायची

तर लागतो सांभाळून ठेवायला तोल

भक्कम बैठक हवी तळाची

त्यावर स्वच्छ पाण्याची सुरई सखोल

अगदी त्याच गोळ्यातून तुला घडवतात

सुंदर सगुण रूपाने सजवतात

जगाचा म्हणतात तुला निर्माता

मातीच्याच पायाचा तुझा , कर्ता करविता

विसर्जनानंतर सारच बदलतं

भग्नावशेष एवढंच रूप रहातं

मातीच्या भांड्याशेजारी पडलेला आशीर्वादाचा हात

पाण्याबरोबर किनाऱ्यावर आलेला वहात.