ये ना तू आई

 गेलीस जरी तू सोडूनी आम्हां

       दिससी ठायी ठायी

 ये ना तू आई ऽ आई ऽऽऽ

      ये ना तू आई ||धृ||

 भास तुझे हे क्षणाक्षणाला

   वाटे तुझाच पदरव झाला

 सोडूनी जाता आम्हा मुलांना

      काळीज द्रवले नाही

 ये ना तू आई ऽ आई ऽऽऽ

        ये ना तू आई ||१||

 वाटे मज तू क्षणात येशील

   आम्हा मुलांना कवेत घेशील

 तव प्रेमाची आस आम्हाला

            ये तू लवलाही

 ये ना तू आई ऽ आई ऽऽऽ

          ये ना तू आई ||२||

 तूच सजविले सुंदर घरकुल

      घरकुलाचे झाले गोकुळ

 गोकुळातुनी निघूनी गेली

          कुठे यशोदा माई

 ये ना तू आई ऽ आई ऽऽऽ

          ये ना तू आई ||३||

 जरीही झालो आम्ही मोठे

    तुझ्यापुढे गं सारेच थिटे

 मूक रूदनाने वाट पाहते

        देवघरातील समई

   ये ना तू आई ऽ आई ऽऽऽ

       ये ना तू ऽ आई ||४||