ही काय चूक आहे?
ही काय चूक आहे?
पटले तसेच जगणे ही काय चूक आहे ?
येता मनात उडणे ही काय चूक आहे ?
सारे मला हिणवती आहे सनातनी मी
सावरकरास पुजणे ही काय चूक आहे ?
आहे गरीब इतका शिकणे अशक्य आहे
सांगा दलीत नसणे ही काय चूक आहे?
सासू सुनेत झगडा पत्नीस राग माझा
आईस देव म्हणणे ही काय चूक आहे ?
दोस्ती अमेरिकेशी कम्युनिस्ट लाल होती
नाती नवीन विणणे ही काय चूक आहे ?
या राजकारण्यांची वख वख नजर भुकेली
आण्णा हजार असणे ही काय चूक आहे ?
धान्यास पिकवितो जो असतो स्वतः भुकेला
घेऊन फास मरणे ही काय चूक आहे ?
न्यायालयात खटले वर्षानुवर्ष सडती
पणतूस न्याय मिळणे ही काय चूक आहे ?
"निशिकांत" पुण्य केले नाहीस तू कधी मग
ईश्वर तुला विसरणे ही काय चूक आहे ?