कळीची किंकाळी
कळीची किंकाळी
उंच उंच पहाडांचे ही हलले असेल लक्कन काळीज ,
त्यांच्यावरचा बर्फ सुद्धा बसला असेल अश्रू गाळीत !
देवदारचे वृक्ष हि करत असतील करुण रुदन ,
अन म्हणतात ह्या जागेला पृथ्वीचे नंदनवन !
बंदुकीच्या गोळ्या अन काडतुसे काय कमी होती ?
इवलीशी कळी सुद्धा त्या नराधमांसाठी सावज होती !
धर्माचा अर्थ सुद्धा जीला मुळी ठाऊक न्हवता ,
त्या कोवळ्या फुलपाखराचा झाला काय गुन्हा होता ?
पंख तिचे कापताना, हात कसे कापले नाहीत ?
आर्त किंकाळ्यांनी तिच्या, कान कसे गोठले नाहीत ?
कन्यापूजनाची म्हणे आमच्या कडे फार महिमा ,
त्याच कन्येच्या शरीरावर दिल्या त्यांनी सह्यांशी जखमा ?
माणसानेच फ़ासलाय आज माणुसकीला काळिमा,
न्यायकर्ते झोपले आता न्याय कुठे मागावा ?
बोल द्रौपदी कशी ठेवशील लाज तुझी उरवून ?
थकला आता कृष्ण सुद्धा वस्त्र तुला पुरवून !
देवा अशा सुंदर कळ्या राहू देत तू तुझ्याकडेच ,
नको पाठवू पृथ्वीवर त्यांना, करपतात त्या रोज इकडे !
नको पाठवू पृथ्वीवर त्यांना, करपतात त्या रोज इकडे !!!