चैत्रपालवी

सौंदर्यवती हि सृष्टी, साखर झोपे मधुनी उठली ,

टाकून कात मग नटली , बघ चैत्रपालवी फुटली !

फाल्गुनाच्या रंगांमधुनी हि नुकतीच न्हाऊन निघाली ,

गुलमोहोराच्या तप्त फुलांसह मग चैत्रपालवी फुटली !

सृष्टीच्या तनू वरतूनी , ऋतुराजाने फिरविली ,

अलवार जादूची काडी , बघ चैत्रपालवी फुटली !

ह्या ऋतूबदलाची आली , कोकिळेस कुणकुण कानी ,

मग तारसप्तकामधली हि तान पहा छेडिली ,बघ चैत्रपालवी फुटली !

येता वसंत वसुधेवरती , हि अंग अंग उमलली ,

बसता भ्रमर फुलांच्या गाली , बघ चैत्रपालवी फुटली !

नववर्षाच्या चाहुली , गृहिणींची लगबग झाली ,

मग गुढ्या तोरणे सजली , बघ चैत्रपालवी फुटली !

बघ चैत्रपालवी फुटली !!!