कातर..

कसे लागले वेड जीवाला

कुठुन जुळले रेशीमधागे

चांदरातीला चांदण्यांसवे

कोण कुणासाठी हे जागे?

कुठुन येइ असा अचानक

प्राजक्ताचा गंध सभोवती

कुणासाठी अन हसता हसता

नकळत डोळे भरुन येती?

कुणासाठी ही लागे हुरहुर

कशासाठी ये भरुन हा उर

कुणासाठी अन आनंदाच्या

क्षणीही उठते मनात काहुर

कोण आठवे फूल पाहता

कोण आठवे सूर लावता

भास कुणाचे होती आणिक

वाटेवरुनी जाता जाता

कसे, कुठे हे प्रश्न निरर्थक

कोण कुणा देणारे उत्तर

तरी खरे की नाव कुणाचे

आठवता मन होइ कातर.