फोटो फ्रेम चे दुकान
फोटो फ्रेम चे दुकान
सहज चालले होते रस्त्यावरून
अचानक नजर गेली फुटपाथवर
फोटो फ्रेम च्या दुकानावर
सगळे फोटो मांडले होते
फुटपाथवर हारीने
विक्रेता त्यावरची धूळ
झटकत होता बारी बारीने
लक्ष्मी आणि मरियम माता
गळ्यात गळे घालून बसली होती
मक्केच्या फोटोपाशी
राधाकृष्ण हसले होते
शंकराच्या नागावर
गुरू गोविंद सिंगजी फिदा
छान आहे म्हणून हाताने
गणपती दाखवत होता अदा
शिवरायांच्या फोटो पाशी
बसले होते गौतम बुद्ध
शेजारीच रामराया आणि
मारुती सेवेला कटीबद्द
आंबेडकरांच्या फोटो शेजारी
झंकारत होती वीणाधारी
जी वसली होती त्यांच्या
जिव्हेवरी लेखणी वरी
विक्रेता घालून होता गोल टोपी
पण त्याने गोष्ट शिकवली सोपी
सारे देवधर्म त्याने
बसविले एका ओळीने
जे नांदत होते गुण्यागोविंदात
जे जमले त्याला ते आपल्याला
जमेल का उभ्या आयुष्यात