निळा सूर्य
निळा सूर्य
या धरतीवर आली कितीतरी , नररत्ने ती जन्माला
परी न भिमासम दुजा , यासम हाच घडला
स्वकर्तुत्वाने अथक प्रयासे , विश्वात चमकला
बुद्धाचा हा निळा धम्म ध्वज आसमंती फडकला ।।१।।
रात्रीचा करुनि दिवस , विद्या व्यासंग जोपासला
परदेशी जाऊन , प्रसंगी एका पावावर राहिला
वकिलीची सनद घेऊनि सूर्य मायदेशी परतला
न्यायासाठी एक होऊनि सभागृही आग ओकला ।।२।।
हाक ऐकुनी दलितांची , चवदार तळ्याचा लढा दिला
तळे अन काळाराम मंदिर, दलितांसाठी खुला केला
नवविचारा नवभाकिता , दलित उद्धारीला
शिक्षणाची ज्योत पेटवून,नेली शिखर वैभवाला ।।३।।
राज्यघटना लिहून भारताचा शिल्पकार मिरवला
भिमाईचा पुत्र हा महान , भारतरत्न गौरविला
एक ध्यास एक आस , बांधवांसाठीच झटला
कोटी कोटी प्रयत्नांनी , राखली ती अस्मिता ।।३।।
भीमाच्या या निळ्या झेंड्याचा, मान आम्ही राखतो
हृदयात ठेवुनी आस तुझी ही , ज्ञान कवेत घेतो
धम्म दीप देई प्रकाश , नित सत्य मार्ग दावितो
महाज्ञानी महामानवाला आम्ही सर्व वंदितो ।।४।।