बालवाडीतील आठवण

होतं खूप मजेदार

आमचं बालपण

घरं होती खूप लहान

खेळायला मोकळं मैदान //१//

शाळेचं होतं

भारीच आकर्षण

वयं वाढवून मग

झालं शाळेत पदार्पण //२//

अक्काचं बोट धरून

गेले होते शाळेला

होतो हसत खिदळत 

बाईंना बघता कुलूप तोंडाला //३//

एकदाचं शाळेत

दाखल झालं नाव

कौतुक भरल्या नजरेनं

चारी दिशेला घेतला ठाव //४//

शाळेची होती

खूप खूप आवड

सुटका होणार होती

गहू तांदूळ निवड //५//

छप्पर गळकी पत्रांची

जमीन माती सारवणाची

जागोजागी होते पोपडे

बिना डेस्क बाकांची //६//

तरीही खूप खूप आवडली

घरच्याच कपड्यात भरली

कुठचा युनिफॉर्म न कुठला डबा

खेळता खेळताच सुटली //७//