प्रेमगीत

मोहरून जातो जीव , घेता कुशीत

रोमरोमी शहारते , तुझ्या प्रितीत //ध्रृ//

लाज ही सारुनी , प्रीत रंगली अशी

सर्वांगावरी ही नक्षी , रेखली कशी

रातराणी सुगंधात ही, रात वेडीपिशी

शशी आला कसा हा , चांदणं शिंपीत //१//

रोमरोमी शहारते तुझ्या प्रीतीत//ध्रृ//

काजव्यांसंग चंद्रमा हा, आला खेळूनी

गंध उधळीत वात , तो ही आला अंगणी

सावल्यांचा खेळ चाले , चंद्रकिरणी

पान्हावते मन राजा , येता तू मस्तीत //२//

रोमरोमी शहारते तुझ्या प्रीतीत//ध्रृ//

रातकिड्यांचं संगीतही , चाले रात्रीत

चांदव्यासमवेत , ह्या चांदण्या वेचीत

चल रं सख्या जरा , मस्त गारव्यात

शुभ्र दंवात न्हाऊ ,होऊ पुलकीत //३//

रोमरोमी शहारते तुझ्या प्रितीत //ध्रृ//

तव स्पर्श होता , थरारते अंगांग

लक्ष लक्ष डोळे , न्याहळती सर्वांग

फुलपंखी पियुष , प्राशिता शुभांग

मनी वसंत फुलतो , मोगरा मोहवीत //४//

रोमरोमी शहारते तुझ्या प्रीतीत //ध्रृ//