नाती

कोण कुठल्या वाटेवरती,

कशी पावले माझी वळती 

मन माझे कुठे धावते ,

हृदय कोणत्या गाव जाते

कोणा संगे कसे बोलावे , 

कोणा संगे कसे वागावे

कुठे बोलावे , कुठे नाही ,

हे मजला कळत नाही 

गप्प मी बसलो तरी चुकीचा , 

बोललो तरीही नाही कुणाचा

भेद कळे ना हा नात्याचा , 

मी रागावतो, मी ओरडतो , 

तरीही मी का त्यालाच शोधतो 

कोण , कोणाचा मी आहे हे ,

कसा दरवेळी मीच विसरतो

तिसरा येतो माझ्या दारी, 

त्याच्याशी मी गोड बोलतो 

पण माझ्या बरोबरीचा त्याला ,

दरवेळी गृहितच धरतो 

त्याने माझे सर्व करावे , 

त्याने माझे सर्व सहावे ,

मी बोलावे त्याने ऐकावे,

चार चौघात गप्प राहावे 

माझ्या इच्छा , माझी मर्जी ,

त्याला साधी अर्जी ही नाही 

त्याने फक्त सहन करावे ,

प्रश्न कधी ना विचारावे 

नात्यांचा कसा खेळ हा , 

एकाने जिंकत राहावे ,

दुसऱ्याने हरत राहावे 

बरोबरी चे आपण म्हणनारे ,

कधी मागे पुढे राहुन जाती 

एक रंगीत , एक बेरंगी ,

तरीही जुळवती कशी तरंगे 

ही नात्यांची उणीव की ,

ही नात्यांची जादुगिरी 

कधी वळता वळत नाही, 

कधी जळता जळत नाही 

पण एक दिवस असाही येतो, 

नाते हाती राहत नाही, 

कितीही घट्ट पकडले तरीही 

हात त्यांचा सुटून जातो ,

फक्त आठवण राहते मग 

एकट वाटत तेव्हा हेच ,

भरलेलं जग 

पण तेव्हा मी एकटाच राहतो 

अन् पुन्हा मला हा प्रश्न पडतो 

कोण कुठल्या वाटेवरती , 

कशी पावले माझी पडती ?