मृगजळ गझल

कानांत गूज सारे सांगायचे अचानक

रागात का तुझ्याशी बोलायचे अचानक ?

सारे मला कळाले, मी चूप तोंड केले

खोटे कसे तुझ्याशी, वागायचे अचानक ?

गुंत्यात अडकणे हे, वाटे कठीण आहे

का रोज मी तरीही, गुंतायचे अचानक ?

आधार लाकडाचा, मजबूत गलबताला

संबंध ते कसे मी, तोडायचे अचानक ?

रेखाटले मनोहर, संसार चित्र सुंदर

ते चित्र आपले का, खोडायचे अचानक ?

तोडून हे पुराने नाते तुझ्याबरोबर

नाते नवीन का मी, जोडायचे अचानक ?

हे एकटेच जीवन, बिनधास्त, मुक्तमौला

का मृगजळात खोट्या, अडकायचे अचानक ?