मानव जीवन

योनी चौऱ्यांशी भोगून

भेटे    मानवाचा  तन |

कर्म   चांगले   करून

भोगा  आनंदी  जीवन ||१||

आहे  मानव   जीवन

जगी  खूप  मूल्यवान |

करा  चांगले  कर्तव्य

मनी  ठेऊनिया जाण ||२||

नीती  प्रेम  सद्भावना

त्याग  नि  परोपकार |

सेवा     सहनशीलता

मनुष्याचे    अलंकार ||३||

अर्थार्जन   मोहापाई

विसरला तू  सद्गुण |

अनैतिक   कृत्यामुळे

आले  तुला  अवगुण ||४||

तुझ्या   अवगुणांमुळे 

सारा  बिघडला तोल |

स्वतःचीच  किंमत तू 

केली आहे मातीमोल ||५||

कृत्य  वाईट करूनी

नको ओढू  बदनामी |

नको  विसरू, वरून

पाही  तुला अंतर्यामी ||६||

आतातरी तू सांभाळ

सोड  दंभ  द्वेष भाव |

कर  असे  कर्म जगी

मेल्यावर  राही  नाव ||७||

जपण्यास नीतीमुल्ये

कर   सत्संग  भजन |

वाच  चांगली पुस्तके

सत्कारणी  होई  मन ||८||