Library
मानाचा मुजरा
मानाचा मुजरा
माय मराठी स्वीकार तू
मान-मुजरा या भक्ताचा
तुझ्याच पायी समर्पित
कणकण हा रक्ताचा ¦¦१¦¦
तुझ्याच रक्षणासाठी क्षणक्षण
तिष्ठत मर्द मावळा इथला
तुझ्या पोटी जनन माते
धन्य जन्म हा जाहला ¦¦२¦¦
माय तू सर्वस्व आमुचे
नव्हे फक्त तू एक भाषा
विश्वरूप तुजला लाभावे
हिच मनी मानसी आशा ¦¦३¦¦
तुझ्याच चैतन्यातून माते
प्रसवली मराठी संस्कृती
दिगंतात पसरो सदैव
तुझ्याच थोरवीची किर्ती ¦¦४¦¦
तुझी गोडीच अवीट
अमृतानेही लाजावे
शब्ददरिद्री मी माते
गुण किती तुझे गावे ¦¦५¦¦
अलंकाराने मढलेली
तुझ्या लावण्याची खाणी
ऊतभावस्पर्शी भिडलेली
साऱ्या बोलींची तू राणी ¦¦६¦¦
"माय"म्हणूनच आम्ही
साद तुजला घालतो
वैश्विक तुझ्या रुपासाठी
पदोपदी झगडतो ¦¦७¦¦
मायदेशी रहावे वा
जावे परक्या देशास
अवघ्या ब्रह्मांडात भासे
माय मराठीचा वास ¦¦८¦¦
ज्ञानदेवे सांडियले
दीपिकेच्या ओव्यांतून
सुधा जीवास तारते
माये तुझ्या पान्ह्यातून ¦¦९¦¦
भजन,किर्तन ,भारुड
गवळणी कर्णमाधुरी
पोवाड्याची मर्दानगी
आम्हा माहेरची शिदोरी ¦¦१०¦¦
औचित्य कवितेचे आज
अस्तित्वाचा "म्हणे" प्रश्न
आम्ही जागृत सक्षम
छत्रपती शिवबासमान ¦¦११¦¦
