माझ्या मनीचे प्रेमगाणे
माझ्या मनीचे प्रेमगाणे
तीच रात्र आसमंत
चांदण्यांना तेज नसे
माझ्या मनीचे प्रेमगाणे
परी तुला सांगू कसे ||0||
चित्र रेखियले तुझे
हृदयावर या प्रितीने
तुला न कळता प्रेम केले
आगळ्याच रीतीने
तुझेच स्वप्न लोचनी माझ्या
तीनही प्रहर वसे
माझ्या मनीचे प्रेमगाणे
परी तुला सांगू कसे ||1||
असता समीप तूच माझ्या
देखणी वाटे निशा
गंध तुझा दरवळता सखे
गंधल्या दाही दिशा
वाऱ्यातूनी तरळतात
कर्णमधुर सूर जसे
माझ्या मनीचे प्रेमगाणे
परी तुला सांगू कसे ||2||
प्रीत तुझी ही का वसते
माझ्या रोमारोमातुनी
साद देतो आज तुजला
मनाच्या गाभाऱ्यातूनी
तोडलेस जर हृदय माझे
आज होईल ग हसे
माझ्या मनीचे प्रेमगाणे
परी तुला सांगू कसे ||3||
स्पंदनाची संवेदना ही
अंतरी माझ्या उठे
हुरहूर ही प्रीतीची
आज अचानक कुठे
या प्रीतीचे पडसाद उठती
हृदयी जसेच्या तसे
माझ्या मनीचे प्रेमगाणे
परी तुला सांगू कसे ||4||