माझी माय

जन्म घेऊन तुझ्या पोटी 

धन्य मी झालो 

तुझ्यामुळेच आई मी 

या दुनियेत आलो 

नऊ महिने गर्भात ठेऊन 

सांभाळ माझा केला 

क्षणोक्षणी वर्षाव तुझ्या प्रेमाचा 

माझ्यावर झाला

तळहाताच्या फोडाप्रमाणे 

तू जपलस 

मायेचा पदर पसरून 

मला सांभाळलस 

भराव माझं पोट म्हणून 

तू उपाशी झोपलीस 

आयुष्यभर माझ्या सुखाचा 

विचार करत राहिलीस 

माझ्या उज्ज्वल भविष्यासाठी 

रक्ताचं पाणी तू केलं 

ठेच लागताच माझ्या पायी 

प्रथम तुझ्याच डोळ्यात पाणी आलं 

पूर्ण आयुष्य खर्च केलस 

माझ्या सुखासाठी 

धन्य झालो माय मी 

जन्म घेऊन तुझ्यापोटी 

स्वामी तिन्ही जगाचा 

आसुसला तुझ्या मायेसाठी 

फिकी अमाप धनदौलत 

उभी तू ज्याच्या पाठी 

सांग ना ग माय 

काय करू मी तुझ्यासाठी? 

नाही फिटणार तुझे उपकार 

जरी जन्म घेतले कोटी न कोटी