कविता... बहरू लागली...
कविता... बहरू लागली...
मी हाक दिली तिने साथ दिली,
रुसलेल्या मनाला अलगद मिठी दिली,
प्रसंगाचा ठाव घेत हळूच फुलू लागली,
ती बहरू लागली ||
बंधन उरले नाही विषयांना,
कधी वाद कधी संवाद रंगताना,
विचारांचे गांभिर्य दाखवू लागली,
ती बहरू लागली ||
भावभावनांचा वेग आवरताना,
विचारांना वळणदार मार्ग दाखवताना,
सत्यतेचा अविरत प्रवास करू लागली,
ती बहरू लागली ||
निसर्गाचा देखावा दाखवताना,
भ्रमंतीची प्रतिकृती रेखाटताना,
संवर्धनाचा संदेश गिरवू लागली,
ती बहरू लागली ||
खचलेल्या यौवनाला आधार देताना,
प्राेत्साहनाची ऊर्जा पुरवू लागली,
सामर्थ्याची शक्ती शिकवू लागली,
ती बहरू लागली ||
चालीच्या ठेक्यावर डोलताना,
अनुभवाचा पोशाख चढवताना,
सुविचारांची देवाण घेवाण करू लागली,
ती बहरू लागली ||