काहूर
काहूर
निळ्याभोर आकाशात पक्ष्यांचे थवे विहरता ,
सर्वदूर जमीन व शिखरांवर दव पसरले असताना ,
सकाळची कोवळी सूर्यकिरणे चमचमताना ,
प्राजक्ताच्या फुलांचा सडा पडलेला दिसताना ,
कोकिळेच्या मंजुळ आवाजाची साथ असताना
का कुणास ठाऊक तिच्या मनात काहुर उठलं होतं !
दारात सडा टाकून नक्षीदार रांगोळी काढताना ,
बागेतील सुंदर रंगीबेरंगी फुले परडीत ठेवताना ,
निशिगंध , शेवंती , मोगऱ्याचा सुगंध पसरता ,
कानावर सुरेल आवाजात गाण्याचे सुर पडता ,
गाय तिच्या वासरासाठी कासावीस होवून हंबरता ,
का कुणास ठाउक तिच्या मनात काहुर उठलं होतं !
सकाळच्या न्याहारीला चविष्ट कांदेपोहे बनवताना ,
कामावर जाणाऱ्या नवऱ्याला निरोप देताना ,
आरशासमोर बसून निटनेटके तयार होताना ,
ताजी हिरवी भाजी निवडताना ,
वर्तमानपत्रात आवडीचा लेख वाचताना ,
का कुणास ठाउक तिच्या मनात काहुर उठलं होतं !
सासू - सासऱ्यांकडून होणाऱ्या कोडकौतुकाने ,
सायंकाळी देवासमोर समई तेवत असताना ,
हाथ जोडून मनोभावे नमस्कार करताना ,
अजुनही माहेरच्या आठवणीने व्याकुळ होताना ,
सायंकाळी नाजुक सुवासित गजरा विकत घेताना ,
का कुणास ठाऊक तिच्या मनात काहुर उठलं होतं !
कपड्यांच्या नीटनेटक्या घड्या घालताना
रुमालावर नक्षीदार वेलबुट्टी भरताना ,
लोकरीचे इवलेशे पायमोजे विणताना ,
पक्षी आपल्या पिलाला भरवत असताना ,
शाळेत जाणाऱ्या मुलांना मनसोक्त बागडताना पाहून
का कुणास ठाउक तिच्या मनात काहुर उठलं होतं !
आज शेजारी बारश्याचा सोहोळा न्याहाळून ,
आईच्या मांडीवर नीजलेल्या तान्ह्या बाळाला पाहून,
थट्टा मस्करीत कुणीतरी केलेला प्रश्न ऐकून ,
आज तिच्या मनात उठलेला ते काहुर ,
मन व्यथित करून गेलं होतं ,
पण अचानक पाठीवर कोणाचा तरी मायेने फिरणारा हात ,
आशा अन दिलासा देवून गेला होता !