जीवनपथ

जीवनपथ हा चालता

बोचती कधी काटे

पायी खडा टोचतो कधी 

कधी मखमली जाजम वाटे

वाट कधी शुष्क कोरडी

कधी चिखल निसरडा भेटे

वाट सरळ ती असे कधी 

वळणे कधी वेडीवाकुडी 

चढ कधी कधी उतार

वाटे कधी ती छान फाकडी

साथ मिळे प्रेमळ कधी

कधी सहचर मिळती उफराटे

कधी छान आसमंत

हवा सुगंधित मंद मंद

कधी छळी तो उग्र वास 

धरुनी जीव मुठीत बंद 

कुणा न ठाऊक अंतर किती ते

किती कापले किती राहिले

जायचे कुठे भ्रमण सदाचे

फिरत राही जीव फुका

सतत संभ्रम कधी मनात

कधी संथ संयत 

तर फरफट कधी

प्रवास असा हा जीवनाचा 

क्षणोक्षणी स्थिती

बदलत जाई !