स्पर्श पावसाचा

शहारल्या धरणीला ,स्पर्श पावसाचा झाला ,

रंग हिरवा प्रेमाचा, पानोपानी बहरला ||१||

दाटूनी मेघ आले , घन निळा ओथंबला ,

झुलतांना फुलास पाहून , वारा गालात हासला ||२||

रूणुझुणू वाजवीत वेणू  , बरसल्या सरीमाला 

स्वर झाले चिंब ओले , सूर धरणीला गवसला ||३||

बेधुंद झाल्या दिशा , नाद प्रीतीचा गुंजला 

अंतरीचा हळवा भाव , सुगंधात पार भिजला ||४||

नटली वसुंधरा , साज सृष्टीला चढला 

जणू कुण्या चित्रकाराने , फिरविला रेशमी कुंचला ||५||

अस चांदणपाऊस , रोमारोमात भिनला 

जाता जाता हळूच कानी , एक गूज सांगून गेला ||६||