जीवनघाट
जीवनघाट
कष्टावरती निष्ठा आहे,हवा कशाला थाट
वा-यासंगे या सहज चढावा जीवन घाट ||धृ||
अलगद जाते निघून ती पायाखालची वाळू
तरी धरावा धीर माणसा,टिपूस नको गाळू
कवेत घ्यावे त्या दर्याला भेदूनिया लाट ||१||
हजारवेळा उठलो पेटून,कुठे बदलले काय
नकोनको ते घडत रहाते,निमूट पेलत जाय
शांत राहूनी,दु:ख साहावे सोडू नको वाट ||२||
आपुल्या हाती काही नाही,बोल तेवढे गोड
-हदयामध्ये प्रेम ठेऊनी,जपत रहावी ओढ
फुले असो वा असोत काटे प्रारब्धाचे ताट||३||