झालं गेलं विसरून जाऊ

झालं गेलं विसरून जाऊ

एकदा आपण भेटून घेऊ

    किती असला मनात राग

    एकदा सारा गिळून घेऊ

मनीं दाटल्या वेदना सार्‍या

एकदा आपण वाटून घेऊ

    होणार नाही पुन्हा भांडण

    एकदा बसुन ठरवुन घेऊ

अस्तव्यस्त या संसाराला

एकदा सार सावरून घेऊ

    चुकले असेल माझे तुझे 

    एकदा सारे जुळवून घेऊ 

विरहात या एकटे आपण

एकदा प्रेमात भिजुन घेऊ

    आठवांच्या मधुर क्षणात 

    एकदा परत रमुन घेऊ

काय खरे खोटे जीवनाचे 

एकदा मनसोक्त जगून घेऊ 

    झालं गेलं विसरून जाऊ 

    एकदा आपण भेटून घेऊ