हे रोजचेच आहे
हे रोजचेच आहे
माझी प्रत्येक सकाळ
तुझ्या गोड स्मित हास्याने होणे
अन् माझे प्रसन्नतेने हसणे
हे रोजचेच आहे |
मी न बोलताही केवळ
माझ्या हावभावांवरून
तू मनातले ओळखणे
हे रोजचेच आहे ||
सकाळच्या घाई गडबडीत
बनवलेला स्वयंपाक देखील
चांगला झाला होता
याची तुझ्याकडून न चुकता
पावती मिळणे हे रोजचेच आहे |
दिवसभर आपापल्या व्यापांत
व्यस्त असलेल्या आपल्याला
गार गार कातरवेळी
आपले हक्काचे क्षण मिळणे
हे रोजचेच आहे ||
संसाराला सुरुवात करून
इतकी वर्ष झाली तरीही
एकमेकांची ह्रदये प्रीतकमलांनी
ओसंडून वाहणे
हे ही रोजचेच आहे ||