गोमाता नंदन

कृषीवल मित्र सखा

बैल गोमाता नंदन

निरागस बालकाचे

मित्रा स्वीकारी वंदन

राब राबतो शेतात

किती देह झिजवतो

तुझ्या कष्टावर आम्ही

अन्न धान्य पिकवतो

तुला तमा नाही कधी

थंडी, वादळ वाऱ्याची

सर्दी होत नाही कधी

झड लागे पावसाची

नाही रुसवा फुगवा

सदा कष्ट उपसतो

शेतकरी धन्यासाठी

नित्य इमान राखतो

येता उत्सव पोळ्याचा

तुला अंघोळ घालतो

कंठी घुंगुराच्या माळा

अंगी  झुली चढवतो

कामा विश्रांती देऊन

तुझी वरात काढतो

घास पुरणपोळीचा

तुला खावयाला देतो