दरवळ

मंद झुळुक ही, येतो सरसर

अंगावरती काटा

आली कुठूनी दरवळ

गेली गंधीत करूनी वाटा

हिरव्या रानी, कुजबुज कानी

बहरून धरती, गाते गाणी

आले लहरी वारे

डुलती तरूवर भिजल्या शाखा

आली कुठून दरवळ

गेली गंधीत करूनी वाटा

क्षितिजावरती झुकते अंबर

सरितेलाही भेटे सागर

आले धावत तरंग

हसती खळखळूनी या लाटा

आली कुठून दरवळ

गेली गंधीत करूनी वाटा

कृष्ण बावरी राधा आणि

कळी भ्रमराची तीच कहाणी

जीवन अर्पून करी अमर ती

प्रीतच जाता जाता

आली कुठून दरवळ

गेली गंधीत करूनी वाटा