बप्पा

बप्पा, गावोगावी-घरोघरी तुझे

स्वागत होतेय जोडुनी कर;

"गणपती बाप्पा मोरया" जल्लोषाने

सर्वत्र भावभक्तीचा जागर

बप्पा, पण तुझ्या या भक्तीला

केव्हाच वाळवी लागलीय ;

"झिंग झिंग झिंगाट"ची

मस्ती डोक्यात दाटलीय

बप्पा, तुजवरची श्रद्धा झोपलेली

तर विश्वास पेंगतो आहे;

बघ तुझा सच्चा भक्त

दारूच्या नशेत झिंगतो आहे

बप्पा, तुझ्या मुकुटावरचा

रंग केव्हाच उडून गेलाय;

नैतिक मूल्ये - संस्कारांचा

सूर्य क्षितिजावर बुडालाय

बप्पा, येथे केवळ सोशल

मीडियावर कावकाव करणारे कावळे;

"बुद्धीची देवता" म्हणून तूच

उघड यांच्या बुद्धीची कवाडे

बप्पा, ऐकू येईल गजर

तुझा दाही दिशात गुंजलेला;

जाती-धर्माच्या नावाने

अन्याय- अत्याचार माजलेला

बप्पा, भक्ती कशीही असली

तरी सुख-शांतीचा आशिर्वाद दे;

पुढच्या वर्षी येताना सुपाएवढ्या

कानात बोळे घालूनच ये