बोल लाडके बोल

करतो पूर्णच आज वादा

आजचा दिवस माझ्यासाठी

मुळीच नाही साधा

पत्नी दिवस म्हणतात याला

पर्वणी आहे मोठी

कौतुकाची आली गाणी

कितीतरी ओठी

हिंदी इंग्लिश की मायमराठीत

कुठले गाऊ सांग

थोडेतरी फेडीन म्हणतो

आज तुझे पांग

माझ्या सारखा अवखळ नमुना

तूच सांभाळतेस राणी

घर ठेवतेस सुगंधीत

होऊन अत्तरदाणी

प्रवास तुझ्या सोबतचा हा

मखमली केलास रस्ता

जाणतो मीही किती खाल्ल्यास

घरासाठी खस्ता

सगळंच काही बोलून आज

होईल कसं व्यक्त

आज आणलेला गजरा

बोलेल तुझ्याशी मनसोक्त

चतुर्थीचा उपवास आहे

हाही योगायोग

गप्पा मारूनच पोट भरू या

करू नवा प्रयोग

किती दिवस गप्पांचा

फड नाही जमला

राजा तुझा कामा मध्येच

नको इतका रमला

संसाराचे गणित अवघड

पण तूच शोधलेस सूत्र

म्हणून झालीस पत्नीपेक्षा

खरी जिवलग मित्र

शाबासकी आज दिलखुलासपणे

कर इकडे पाठ

विचार करूनच विधात्याने

बांधली आपली गाठ

तूच जानेमन तूच डार्लिंग

तूच माझी हनी

काय काय सांगू आज

खूप साचलंय मनी