बेचैनी माझी

डोळ्यांमध्ये दाटावी बेचैनी माझी

एकांताने वाचावी बेचैनी माझी

जिद्दी वृत्तीचा मी कैदी पक्षी आहे

आभाळाने जाणावी बेचैनी माझी

माझ्यापाशी सांजेला कोणीही नाही

मी कोणाला सांगावी बेचैनी माझी

माझ्यासाठी डोळ्याला येतो कोणाच्या

त्या अश्रूने मांडावी बेचैनी माझी

अंधाराने कानाडोळा केला रात्री

चंद्राने सांभाळावी बेचैनी माझी

माझ्या तृष्णेचा अंदाजा आहे ज्याला

त्या दर्याने मोजावी बेचैनी माझी

काही बाकी राहावे ना पाठीमागे 

काही ऐसी संपावी बेचैनी माझी