औक्षण
औक्षण
नाते बहीण भावाचे , असे किती किती गोड
असे बहिणीला सदा , भाऊरायचीच ओढ !!
कधी येशील भाऊराया , वाट पाहते बहीण
तुझ्याविना माझा , सुना सुना रे हा सण !!
डोळे लागले वाटेला , माझे आतुरले मन
आठवण तुझी भाऊराया , येते क्षणो क्षण !!
अडकलास कर्तव्यात , नाही येणार तू या घडी
घेऊन आरतीचे ताट , वाट पाहते बहीण ही वेडी !!
देशसेवेसाठी तुझे , तू अर्पिले रे जीवन
तना मनाने करतो , माझ्या मायभूमीचे रक्षण !!
नाही कमजोर धागा , हा तर रेशमी बंध
तुझ्या घामाला ही येई , माझ्या मातीचा सुगंध !!
सीमेवरील माझ्या प्रत्येक भावाचे , देवा कर तू रक्षण
त्याच्या दीर्घायुष्यासाठी , करते येथूनच औक्षण !!
माया या बहिणीची , सदा आहे तुझ्या पाठीशी
नाते तुझे माझे , जुळले मनाचे मनाशी !!
माझ्या राखीचा भाऊराया , ठेऊनिया मान
कर देशाची तू सेवा , तुझा आम्हा अभिमान !!
कधी मानू नकोस हार , लाव प्राणाची बाजी मायभूमीच्या रक्षणी
नको काही मज दुसरे , दे हीच ओवाळणी !!