अजून यौवनात ‌मी

केस असू देत पिकलेले माझे

कलप करून दिसतात छान |

मात्र अजूनही यौवनातच मी

नका बघू असे वळवून मान | |१

बोळकं झाले तोंडाचे जरी

करते मी आईस्क्रीम फस्त |

मात्र अजूनही यौवनात मी

नका बघून मला होऊ त्रस्त | |२| |

नाही ऐकायला येत थोडं

वया परत्वे थकलेत कान |

मात्र अजूनही यौवनात मी

गाणी गात बसते छान | |३| |

डोळ्यांवर ही बसलं ढापण

कमी कमी दिसू लागलं जरा |

मात्र अजूनही यौवनात मी

मी बरी अन् माझा पेपर बरा | |४ |

चाललं तर आता थकतात पाय

वयापरत्वे शरीर जातं थकून |

मात्र अजून यौवनात ‌मी

व्हरांड्यात घेते योगा करून | |५| |