अजब गजब प्रेम

अजब तुझे प्रेम आहे 
मजला कधी न कळले
कसे नकळत दोघांचे 
नाते प्रेमाचे गं जुळले ||१||

मी राहतो नुसता शांत 
तुझा‌ मोकळा स्वभाव 
मनाच्या या कोपऱ्यामध्ये 
फक्त वसतो प्रेमभाव ||२||

माझ्या या शांत स्वभावाला 
लगेच समजून घेते 
हसत खेळत सतत
सोबत मजला देते ||३||

जातोय दिवस चांगला 
तुझी ऐकूनी बडबड 
गप्प गप्प राहता अशी 
होई मनात धडधड ||४||

काय झाले गं विचारता 
करी बोलाया सुरूवात 
तिचे बोलणे थांबण्याची 
मी बसतो वाट पहात ||५||

सारे म्हणतील आम्हाला 
जोडी तुमची ही सुंदर 
मी सदैव राहतो शांत 
ती बोलतसे निरंतर ||६||

विनायक कृष्णराव पाटील बेळगाव