अतूट बंधन
अतूट बंधन
तुझ्या माझ्या मैत्रीचा
होता सुंदर प्रवास
माझ्या हळव्या मनाला
तुझा लाभे सहवास ||१||
अनोळख्या जगातले
मज काहीच कळेना
गेलो हरवून असा
मार्ग काही सापडेना ||२||
जीवनाच्या वाटेवरी
होतो एकटा चालत
हात ठेवी खांद्यावरी
तुझी लाभली सोबत ||३||
अनमोल प्रवासात
बंध जुळले मैत्रीचे
हेच एकमेव नाते
असे जीवनी खात्रीचे ||४||
मैत्री आपल्या दोघांची
होती चारच वर्षाची
सोबतीला असताना
दाटे लहर हर्षाची ||५||
सुंदरशा प्रवासात
काळानेच घात केला
जीवनात अर्ध्यावरी
मज सोडूनिया गेला ||६||
मैत्री अतूट बंधन
आहे आजही मनात
मैत्री अशीच रहावी
अबाधित जीवनात ||७||
मैत्री धागा हा सुखाचा
अनमोल जीवनात
आठवण या मैत्रीची
आहे जपली मनात ||८||
खूप सुखकर झाला
असा मैत्रीचा प्रवास
असे आजही मनात
तुज भेटण्याची आस ||९||