माय मराठी

अमृतात भिजले बोल 

तिची आम्हावरी सावली  

ज्ञाना तुकोबा जनाईस

गोडी मराठीने लावली ll१ll

काळोख सारून युगाचा

साहित्यात रचिला पाया 

तिच्या अमूल्य संस्कारांची 

आम्हा लेकरांवरी छाया ||२||

माझी मायबोली अवीट 

साक्षरतेचे देई धडे

शब्द ज्ञानाचा कल्पतरू 

फोफावला सगळीकडे ll३ll

अभिजात माझी मराठी 

तिची मुळाक्षरे देखणी

शब्द साजाने अलंकृत 

जाई बहरून लेखणी ||४||

गौरव मराठी भाषेचा 

अवघ्या जगतात होई 

या मराठीच्या पालखीचे 

आम्ही सदैव असू भोई ll५ll

हा ध्यास मराठी भाषेचा 

आहे प्रत्येकाच्या मनात 

गौरव माय मराठीचा 

नित्य होईल गगनात ll६ll

विनायक कृष्णराव पाटील बेळगाव