आठवणीतला पाऊस

आठवणीतला पाऊस

आठवणीतला पाऊस करतो मन ओले चिंब।

ढग भरून बरसता, उमटते सुंदर प्रतिबिंब ॥

आठवणीतला पाऊस असतो , अवखळ, खट्याळ।

तारुण्यातील चंचल पावसाचे, ते विभ्रम लडिवाळ ॥

कधी बरसतो मेघ होऊन, श्यामल कृष्ण सखा।

कधी नाचतो अंगणात , जणू मयूर नृत्य बरखा॥

कधी चमकते सौदामिनी, करते ढगात नर्तन।

पाऊस ओला घेऊन येतो, धुंद आठवण॥

मन- मेघ बरसता, स्मृतींनी रोमांचित हो तनू।

प्रसन्न हृदयावरी उमटते, रंगीत इंद्रधनू॥

वर्षे लोटली किती, त्याची नच उरली नोंद।

आठवणीतला पाऊस आता , नाही देत साद॥

पाऊस आता बरसत नाही, ढगही नाही दाटत।

तारुण्यातले रोमांच आता , नाही मनीं उमटत॥

जीवाची कधी होते काहिली, येता आठवणी दाटून।

काळे ढग मनःपटली जमता, सुखवी पाऊस मनात बरसून॥