आठवणी

आठवणींची कुपी..

सहजच उघडली आणि सुगंध मनामनांत दरवळला,

आठवणीच त्या,सरीतल्या मोत्यांप्रमाणे चहूबाजूंनी ओघळल्या,

काही खुपणाऱ्या,वेदनादायक... काही हळुवार मोरपिसासारख्या,मनाची तार छेडणाऱ्या,

काही खुदकन हसवणाऱ्या...काही डोळ्यांच्या कडा ओलावणाऱ्या,

काही चिऊ-काऊच्या...काही बेधुंद,जादुई क्षणांच्या,

काही यशाच्या-अपयशाच्या...काही सफलतेच्या-विफलतेच्या,

काही उधाणलेल्या... काही सुस्त,संथ,

एका आठवणीत गुंफलेली दुसरी,दुसरीत तिसरी...

रमून गेले होते त्यात...

अरे! निघायची पण आठवण राहिली नाही,

बरंय... आठवण असू द्या!!!