आतातरी खरं बोला

अटक मटक टोला, आतातरी खरं बोला||धृ||

ग्रह असून शनी

लागतो कसा मागे

अवदसेशी राहू केतू 

कसे जोडतात धागे

खरचं माणसाने, कैद केला हरेक गोला||१||

 

नवग्रहाची शांती 

कशी पृथ्वीवर होते

पाटावरचे काजू बदाम

कोण बरे घरी नेते

एकसुरात म्हणा, हर हर महादेव भोला||२||

घरोघरी रोज येथे

पुजली जाते गाय 

मग वृद्धाश्रमात

का ठेवली जाते माय 

सांगा सज्जनांनो, कधी उतरवाल खोटा चोला||३||

सतत पडद्यामागे

कशा लपवतात मुली

त्यांच्यावाचून तुमच्या 

का जळत नाही चुली 

घेऊ द्या उंच भरारी, बंद कवाडे खोला||४||

श्रद्धा आणि आस्थेचे 

खेळ खेळतात कोण 

सांग रे देवबाप्पा तू

त्यांना करतात कोण फोन 

जाणुन घ्यावे सत्य, खऱ्या अध्यात्मात डोला||५||