आता थोडं हसावं म्हणतो मी.

*आता थोडं हसावं म्हणतो मी.*

खुप झालं रडत रडत जगणं,

आता थोडंसं हसावं म्हणतो मी.

अनेकांना उघड्या नजरेनं पाहिलं,

कुणाच्या तरी नजरेत दिसावं म्हणतो मी.//1//

अनेकांना रुसतांना पाहिलं आहे,

आता थोडंसं रुसावं म्हणतो मी,

सुखाच्या सावलीत विसावलो आजवर,

दुःखाच्या उन्हात थोडंसं बसावं म्हणतो मी.//2//

माझ्या आठवणीत भिजले जे पण,

आठवणीत त्यांच्या भिजावं म्हणतो मी,

सुख शोधण्या भरकटलो राणावनात,

सुखाच्या सावलीत निजावं म्हणतो मी.//3//

झोपेत स्वप्नं पाहिले आजवर,

उघड्या डोळ्यांनी स्वप्नं पाहावं म्हणतो मी.

आयुष्याचे क्षण केवळ अनुभवले,

कवितेत त्यांना लिहावं म्हणतो मी.//4//

रडत रडत जगणं आहे व्यर्थ,

सत्य हे आता समजावं म्हणतो मी,

म्हणूनच आता ठरवून मनात,

हसत हसत जगावं म्हणतो मी

हसत हसत जगावं म्हणतो मी //5//