आई मज पाहूनी...

गर्भातील मुलीची आईला आर्त हाक......

आई मज पाहुनी.......

आई मज पाहुनी,

करतेस का डोळेझाक,

मारुनी मज टाकुनी

करतेस का हे पाप //१//

येतील सण आई 

दसरा आणि दिवाळी

पंचारती घेऊनी गं

दादास मी ओवाळी //२//

देणार नाही दुःख,

आई कधी तुला गं

तू जग पाहिलेस,

पाहू दे जग मला गं//३//

मलाही वाटतं यावं,

बिलगून बाबाच्या जवळी,

तोडू नको गं मला,

मी खूप आहे कोवळी//४//

तू ही आहेस नारी,

मी ही गं नारी आहे

तुझीच असून मुलगी,

का मारण्याची तयारी आहे//५//

ताईस कुणी नाही,

करण्यास आई मदत

करीन आई काम,

पडेल जे पण हातात//६//

हुंडाच लागतो म्हणून,

का मारतेस तू मला

पोटच्या मुलीला मारते 

कसे आई म्हणू ग तुला//७//