आम्ही शेतकरी आणि कृषी कायदा

मी म्हणत नाही द्यावी तुम्ही भीक

कि द्यावी कर्जमाफीच दान पदरात

ऱक्ताळलेल्या दोरी अन गर्दनीलाही

नकोय पोकळ माणुसकीचा मुलामा

नकोच आहे ते अवडंबर राजकारणी

आणि तितकीच बिकाउ समाजमध्यमे

नकोच आहे घोषणा आश्वासनांचा पाऊस

की तुमच्या तथाकथित कायद्याचे भिजत घोंगड

चालवा बंदुका निधड्या छातीवर

अन चालवा ते रनगाडे लोकशाहीच्या उरावर

करा वाटोळे एकदा सगळ्याच कृषक जातीचे

पडूद्या सडा रक्तामासाचा ... महामार्गावर

हक्कांसाठी लढाई जर गुन्हाच असेल तुमचा तर

करा होळी त्या समानता सांगणाऱ्या सरनाम्याची

सजवा मैफिली आमच्या रक्तामासाच्या त्या सड्यावर

हसा त्या दु:शासना सारखे अबला लाचार द्रोपदीवर

काढा आमच्या इज्जतीचे दिंधोरे चौकाचौकात नाका नाक्यावर

बेमालुम कापत सुटा आमचे गळे त्या बकवासी कायद्याच्या सुरावर

जाणीवाच्या उणीवा असतील काही माझ्यात

काही तुमच्यात

विखाऱ्याच आयुष्य मीही जगलो आहे उन्हातन्हात

ओला सुखा अनुभवला आहे पूर्ण वयात

मी म्हणतो शेवटचाही हिसकावून घ्या घास ताटातुन

अन द्या भिरकावून श्रीमंतांच्या पायरीवर

अन पहा वाट आमच्या निशब्द मरणाची

काही आज

काही उद्या

अन उरलेल्या भविष्यातही