आजा मेला, पंजा मेला
आजा मेला, पंजा मेला
बाजार फुटला, पालं उठली
मनात दाटली गडद छाया
पावलं निघाली घरच्या ओढीनं
हरीण धावे जशी पाडसासाठी
दीडदमडीचा भाव मिळाला
खर्च जाता काय उरलं कप्पाळ ?
वेदनेचा ठाव ना जगण्याला भाव
जनावरागत जीणं पाचवीला पुजलेलं
पिकतं ते विकतं कवडीमोल
चोर - उचक्के नाक्या नाक्यावर
गिधाड टपलीत सावज टिपण्यास
जगणं - मरण नियतीच्या भरवशावर
आवंदाही त्यानं तोंड काळ केलं
आला तेव्हा छाताडावर नाचला
कार बाबा असा कोपतो ?
सरकार, व्यापारी, आता तुही
आजा मेला, पंजा मेला, बाप
मसनात गेलो रे आता मीही
पोरीचं लगीन पोराचं शिक्षण
कसं फेडावं सावकाराचं रीन ?