आई

काय लिहू माते । शब्द न एवढे। 

कोष अर्धा पडे । लिहावया॥१॥

ठेवी नऊ मास । पहीलाच शब्द ।

माय निर्विवाद । आला असे ॥२॥

संस्कारी चांदण्या।ह्रदयी कोरल्या।

गोंदूण भरल्या । तन भरे ॥३॥

माया ममतेच्या। नाही कुठे शाळा।

कोठून जिव्हाळा। शिकलीसे ॥४॥

वेदना अंतरी । प्रथम आरोळी ।

येई वेळोवेळी । मुखातून ॥५॥

पावसात छत्र । ऊब थंडीतली ।

छाया उन्हातली । धरलीसे॥६॥

थांबला न मृत्यु।अटळ ते कर्म।

वाटली न शर्म । यमासही ॥७॥

गेली माझी माय । देवाचीया द्वारी।

ओस पडे सारी । माहेरची ॥८॥

शिकले मी बहू।कामी नाही आले।

व्याधिचे न चाले। उपचारा ॥९॥

येग आई त्वरा। एकली पडले।

मन हे उडले ।वा‍‌र्यावर ॥१०॥

आई आर्त हाक।आता मारू कुणा।

कोणता हा गुन्हा। घडलासे॥११॥

तुझ्या चरणात । ठेवते अभंग ।

रूदनाचा संग ।जडवला॥१२॥