ಸಂಸಾರ ಒಂದು ಜೋಡೆತ್ತಿನ ಗಾಡಿ

ಮದುವೆಯ ಸಂಬಂಧ ಜೋಡೆತ್ತಿನ ಗಾಡಿಯಿದ್ದಂತೆ

ಎರಡೂ ಎತ್ತುಗಳು ಗಾಡಿಯನ್ನ ಒಟ್ಟಿಗೆ ಎಳೆದಂತೆ

ದಂಪತಿಗಳಿಬ್ಬರೂ ಸೇರಿ ಸಂಸಾರವನ್ನ ನಡೆಸುವುದೆಂದರ್ಥ;

ಎರಡು ಎತ್ತುಗಳ ಬದಲು ಒಂದು ಕೋಣವಾದಾಗ

ಎತ್ತು ಏರಿಗೆಳೆದರೆ ಗಾಡಿಯನ್ನ ಕೋಣ ನೀರಿಗೆಳೆವುದು

ಆಗ ಸಂಸಾರದ ನೌಕೆ ಸಾಗುವುದೆಲ್ಲಿಗೆ?

ಇಬ್ಬರು ದಂಪತಿಗಳಲ್ಲಿ ಯಾರು ಎತ್ತು ಯಾರು ಕೋಣ;

ಎಂಬುದನ್ನ ತೀರ್ಮಾನಿಸಲೆಂದು ಇಬ್ಬರೂ

ಕಚ್ಚಾಡುವುದರಲ್ಲಿ ಯಾವ ಉಪಯೋಗವಿಲ್ಲ;

ದಂಪತಿಗಳೀರ್ವರೂ ಒಟ್ಟಿಗೆ ಕುಳಿತು ವಿಮರ್ಶಿಸಿ

ಇಬ್ಬರಲ್ಲಿ ಒಬ್ಬರು ಕೋಣವಾಗಿರುವುದರ ಅರಿವನ್ನ

ಪೂರ್ಣವಾಗಿ ಪಡೆದುಕೊಂಡರೆ ಬಹು ಉಪಯೋಗವಾದೀತು;

ಇಬ್ಬರೂ ಒಮ್ಮೆ ಎತ್ತುಗಳಂತೆ ಏರಿಗಿಳಿದು ದುಡಿದ ಮೇಲೆ

ಮತ್ತೊಮ್ಮೆ ಇಬ್ಬರೂ ಕೋಣಗಳಂತೆ ನೀರಿಗಿಳಿದು ಉಲ್ಲಾಸ ಪಡಲು

ಸಂಸಾರದ ನೌಕೆ ಅಡೆತಡೆಯಿಲ್ಲದೆ ಸುಖವಾಗಿ ನಡೆದೀತು;

ದಂಪತಿಗಳೆಂದರೆ ಒಬ್ಬ ಹೆಣ್ಣು ಇನ್ನೊಬ್ಬ ಗಂಡು ಮಾತ್ರವಲ್ಲ

ಇಬ್ಬರ ಗುಣಗಳೂ ಇಬ್ಬರಲ್ಲಿಯೂ ಇರುವುದ ತಿಳಿದು

ಇಬ್ಬರ ಗುಣಗಳ್ಳನ್ನ ಒಬ್ಬರನೊಬ್ಬರು ಗೌರವಿಸುವಂತಿರಬೇಕು;

ಎರಡೂ ಗುಣಗಳು ಒಬ್ಬರಲ್ಲಿ ಸಮಾನ ಸ್ಥಿತಿಯಲ್ಲಿರಲು

ಅವರ ಜೀವನ ಸದಾ ಸುವ್ಯವಸ್ಥೆಯಿಂದಿರುವಂತೆ

ಹೆಣ್ಣು ಗಂಡುಗಳಿಬ್ಬರೂ ತಮ್ಮ ಪಾತ್ರಗಳಿಗೆ ಬದ್ಧರಾಗಿರಬೇಕು;

ಸಮಾನತೆಯೆಂದರೆ ಇಬ್ಬರೂ ತಮ್ಮ ಪಾತ್ರಗಳನ್ನ

ಮನದಿಚ್ಛೆಯಂತೆ ಅದಲು ಬದಲು ಮಾಡಿಕೊಳ್ಳುವಂತದ್ದಲ್ಲ

ಪ್ರಾಕೃತಿಕವಾದ ತಮ್ಮಇರುವಿಕೆಯನ್ನ ಪ್ರೀತಿಸುವುದೆಂದರ್ಥ;

ಇರುವಿಕೆಯನ್ನ ಇದ್ದ ಹಾಗೆ ಪ್ರೀತಿಸುವುದೆಂದರೇನು?

ಅದು ಪರಸ್ಪರ ವಿಶ್ವಾಸ, ಸ್ವಾತಂತ್ರ್ಯ, ಗೌರವಗಳಿಂದ ಕೂಡಿದ,

ಕಲ್ಪನೆ ರಹಿತ ಮುಕ್ತ ಮನಸ್ಸುಗಳ ನಡುವಿನ ನೇರ ಸಂಬಂಧ.