ಎಚ್ಚರಿಕೆ
ಎಚ್ಚರಿಕೆ
ಹಸಿರುಟ್ಟ ಕಾನನದ
ಕಿರು ಶಿಲೆಯ ಬಿರುಕಿನಲಿ
ಇಳಿ ಸಂಜೆಯ ಹೊಂಗಿರಣದಲಿ
ಹರಿಯುತಿದೆ ಜೀವ ಜಲ.
ಭವಿಷ್ಯದ ಅಸಂಖ್ಯ ನಿರೀಕ್ಷೆಗಳ
ಹೊತ್ತು ಕುಳಿತ
ಎಳೆಯ ಕುವರಿಯರ
ಕಣ್ಣುಗಳ ( ನಯನಗಳ ) ಗತ್ತು.
ಒರಟು ಶಿಲೆಯನ್ನೇ ಸವೆಸಿ
ಮುಂದೆ ಮುಂದೆ ಹರಿಯುವ
ನೀರ ಯತ್ನ ಆಗಬೇಕಿದೆ
ಎಳೆಯರ ರಟ್ಟೆಗೆ ಬಲ!
ಬದುಕಿನ ಆಳ ಎಷ್ಟೇ ಇರಲಿ
ಈಜು ಕಲಿತರೆ ಸಾಕು
ಆಳಕ್ಕೆ ಇಳಿಯಬಹುದು,
ಹೋಗಬಹುದು ಅಗಲಕ್ಕೆ!
ಶಿಲೆಯ ಮೇಲಿನ ಬಾಲೆಯರೇ
ನೀವಿನ್ನೂ ಅರಿಯಬೇಕಿದೆ
ಬದುಕಿನ ಆಳ , ಅಗಲ ಜೋಕೆ !
ಜಾರಿದರೆ ಅಲ್ಲಿ
ಅಪಾಯವೂ ಉಂಟು
ಬದುಕಿನ ಪಯಣ
ಬಲು ದೀರ್ಘವಾದುದು.
ಎಚ್ಚರಿಕೆಯಿಂದ ಹೆಜ್ಜೆ ಇಡಬೇಕಾಗಿದೆ
ಮೇಲೇಳುವ ಮುನ್ನ
ಒಮ್ಮೆ ಯೋಚಿಸಿ,
ಬದುಕು ನಿಂತ ನೀರಲ್ಲ !