ಚಿಣ್ಣರು ಆಡಿದರು ಹೋಳಿಯ

ಪುಟ್ಟನು, ಕಿಟ್ಟನು,ರಾಮುವು,ಶಾಮುವು

ಶಂಭುವು, ರಾಜುವು,ಸೋಮುವು,ದ್ಯಾಮುವು

#Rabg barse ಹೋಳಿಯ ಆಡಲೆಂದು ಸೇರಿದರು

ಬಾನಲಿ ಮಿನುಗುವ ಚಂದದ ಕಾಮನ ಬಿಲ್ಲನು

ಚಿಣ್ಣರೆಲ್ಲರು ಕಂಡು ಬೆಗ್ಗಸ ಬೆರಗಾದರು

ಕಾಮನ ಬಿಲ್ಲಿನ ಏಳು ಬಣ್ಣವ ಧರೆಗಿಳಿಸಿದರು

ಕಿತ್ತಳೆ, ಹಳದಿ, ಹಸಿರು, ನೀಲಿ, ಊದಾನೀಲಿ

ನೇರಳೆ ಎಂದು ಮಳೆ ಬಿಲ್ಲಲಿ ಉಪಲಬ್ಧವಾದ

ಸಪ್ತ ವರ್ಣಗಳನು ಬೆರೆಸಿ ಹೋಳಿಯನು ಆಡಿದರು

ಗಗನದ ಬಿಸುಗದಿರನು ಬಿಸಿಲೊಡನೆ ಬರಲು

ಕೆಂಪು ಬಣ್ಣವನು ಅವನ ಬಳಿ ಕೇಳಿದರು

ಅರ್ಕನು ಕೊಟ್ಟ ಕೆಂಪು ಕಿರಣದ ಬಣ್ಣದೊಂದಿಗೆ

ನಲಿಯುತ ಖುಷಿಯಲಿ ಹೋಳಿಯನು ಆಡಿದರು

ತಾರಾಬಲದ ತಿಂತಿಣಿ ಜೊತೆಗೆ ತಂಗದಿರನು ಬರಲು

ತಾರಕೆಗಳು ಚಿನ್ನದ ಬಣ್ಣದಲಿ ನಿಗಿ ನಿಗಿ ಹೊಳೆಯುತಿರಲು

ಚಿಣ್ಣರು ಚಂದನ ಬಳಿ ಬೆಳದಿಂಗಳ ಬಿಳಿ ಬಣ್ಣವ ಪಡೆದರು

#Rang barse ಎನ್ನುತ ಹಾಡುತ ಹೋಳಿಯನಾಡಿದರು

ಹಚ್ಚ ಹಸಿರಿನ ದುಕೂಲವ ತಳೆದ ನಿಸರ್ಗ ದೇವಿಯ

 ತನುಜೆಯೊಂದಿಗೆ ಮಾತನಾಡಿ ಪಚ್ಚೆಯ ಬಣ್ಣವ ಪಡೆದರು

ನಿಸರ್ಗ ನಿರ್ಜರೆ ಕೊಟ್ಟ ಬಣ್ಣದಲಿ ಹೋಳಿಯನು ಆಡಿದರು

ಯದೃಚ್ಛೆಯಾಗಿ ಹಾರಾಡುತ್ತಿದ್ದ ವರ್ಣರಂಜಿತ ದುಂಬಿಯ

ಬಾ ಬಾ ಎನ್ನುತ ಬಳಿಗೆ ಕರೆದು ಬಣ್ಣವನು ಕೇಳಿದರು

ಯಥೇಷ್ಟ ವರ್ಣಗಳ ಕಾಯದಿ ಹೊಂದಿದ್ದ ದುಂಬಿಯಿಂದ

ಚಿಣ್ಣರು ವಿಪುಲ ಬಣ್ಣಗಳ ಪಡೆದು ಹೋಳಿಯಾಡಿದರು

ಜುಳುಜುಳು ಹರಿವ ಮಿಸುಗುವ ನದಿಯನು ಕಂಡರು

ಅದರ ಸಿಹಿ ನೀರನು ಬಾಯಾರಿದ ಬಾಲಕರು ಕುಡಿದರು

ಅದರೊಳಗೆ ಆಡುವ ಮತ್ಸ್ಯಗಳನು ಕಂಡರು

ಅವಕೆ ಮಂಡಕ್ಕಿಯ ಭೋಜನ ಮಾಡಿಸಿದರು

ಅವುಗಳ ಚಂದದ ಬಣ್ಣವ ಪಡೆದು ಹೋಳಿಯನಾಡಿದರು

ಚೆಂದದಿ ಬಿರಿದು ನಿಂತ ವನಕುಸುಮಗಳ ಕಂಡರು

ಅವುಗಳ ಅಕ್ಷಯ ಬಣ್ಣವ ನೋಡಿ ಅಚ್ಚರಿ ಪಟ್ಟರು

ಪುಷ್ಪಗಳಿಂದ ವಿಭಿನ್ನ ಬಣ್ಣವ ಪಡೆದು ಹೋಳಿಯಾಡಿದರು

ಚಿಣ್ಣರೆಲ್ಲ ಕೂಡಿ ಬೃಹತ್ ಕಾಡಿಗೆ ಹೋದರು

ಅಲ್ಲಿ ಕುಣಿಯುವ ತನ್ವಿ ಮಯೂರಿಯ ಕಂಡರು

ಅದರ ಬಣ್ಣವ ಕಂಡು ಮೂಖವಿಸ್ಮಿತರಾದರು

ಅದರ ಬಳಿ ಬಣ್ಣವ ಕೇಳಿ ಪಡೆದು ಹೋಳಿಯಾಡಿದರು

ಚಿಣ್ಣರೆಲ್ಲ ನಿಸರ್ಗದೊಳಗಿನ ಬಣ್ಣವ ಬಳಿಸಿಕೊಂಡು

ಚಂದದಿ #Rang barse ಹೋಳಿಯ ಹಬ್ಬ ಮಾಡಿದರು.