ಆಶ್ಚರ್ಯವಾಗುತ್ತದೆ.........
ಆಶ್ಚರ್ಯವಾಗುತ್ತದೆ.........
ಮುಂಜಾನೆಯಷ್ಟೇ ಬಿದ್ದ ಮಂಜು ಹನಿ
ಸೂರ್ಯನ ಎಳೆ ಬಿಸಿಲಿಗೆ
ಮುತ್ತಿನಂತೆ ಹೊಳೆಯುತ್ತಾ
ಮುಟ್ಟಿದರೆ ಬೊಗಸೆಯಲ್ಲುಳಿಯದೆ
ನುಣುಚಿ , ಕೆಳಜಾರಿ ಬಿಸಿಲು ಹೊತ್ತೇರಿದಂತೆ
ಕರಗಿ ಮಾಯವಾಗಿ ಇಳಿ ಹೊತ್ತಿನಲ್ಲಿ
ಪುನಃ ನಕ್ಕು ನಲಿಯುವ ಸಂಭ್ರಮಕೆ
ಆಶ್ಚರ್ಯವಾಗುತ್ತದೆ ......
ಒಣಗಿ , ಇದ್ದಲ್ಲೇ ಉದುರಿ ಬೀಳುತ್ತಾ
ಬಿದ್ದಲ್ಲೇ ಚಿಗುರುತ್ತಾ , ಬೆಳೆಯುತ್ತಾ
ಮೈತುಂಬಾ ಟಿಸಿಲೊಡೆದು ಮೊಗ್ಗರಳಿ
ಮುಂಜಾವಿನ ಮಂಜು ಹನಿಗೆ ಕಾತರಿಸುತ್ತಾ
ತಲೆಬಾಗಿ ನರ್ತಿಸುತ್ತಾ
ಘಮಘಮಿಸುವ ಪರಿಮಳಕ್ಕೆ
ಆಶ್ಚರ್ಯವಾಗುತ್ತದೆ ........
ಬಿದ್ದ ನೀರೆಲ್ಲಾ ಮಡುವಾಗಿ , ಕೆರೆಯಾಗಿ
ತುಂಬಿ ಹರಿವ ನದಿಯಾಗಿ
ಸಾಗರ ಸೇರುವ , ಪುನಃ ಆವಿಯಾಗಿ
ಮೇಲೇರಿ ಮೋಡವಾಗಿ , ತಂಪಾಗಿ
ಸುರಿವ ಮಳೆ ಹನಿಗಾಗಿ
ಆಶ್ಚರ್ಯವಾಗುತ್ತದೆ .......
ಹಗಲು ಕಳೆದು , ಇರುಳು ಮೂಡುತ್ತಿದ್ದಂತೆ
ನಿನ್ನೆಗಳು ಮಾಯವಾಗಿ
ಕಾಲ ಗರ್ಭದಲ್ಲಿ ಸೇರಿ
ಮಾಯವಾಗುವ ಬಗೆಗೆ
ಆಶ್ಚರ್ಯವಾಗುತ್ತದೆ .....
ಭೂತ ವರ್ತಮಾನದಲ್ಲಿ ಆದ
ಸಂಭವನೀಯ ಅಸಂಭವಗಳು ಉದ್ಭವಿಸಿ
ಸತ್ಯ - ಮಿಥ್ಯಗಳ ನಡುವೆ
ಹೋರಾಡುವ ಮನುಜರು ಸೋತು
ಶೂನ್ಯಗೊಳ್ಳುವ ಬಗೆಗೆ
ಆಶ್ಚರ್ಯವಾಗುತ್ತದೆ ........